Pas dështimit të votimit për kabinetin e ri qeveritar në Kuvendin e Kosovës, kryetari i Lëvizjes Vetëvendosje, Albin Kurti, ka reaguar duke paralajmëruar se vendi do të shkojë drejt zgjedhjeve të reja parlamentare.
Në një reagim në rrjetet sociale, Kurti falënderoi të gjithë deputetët që e mbështetën propozimin për Qeverinë “Kurti 3”, si dhe qytetarët për përkrahjen e vazhdueshme ndaj lëvizjes së tij politike.
“Falënderoj të gjithë deputetët që mbështetën propozimin për kabinetin e ri qeveritar dhe qytetarët për përkrahjen. Meqë 56 vota ishin PËR, 52 KUNDËR dhe 4 ABSTENIME, nuk mund të fillojë ende mandati ynë i ri. Ndërkohë, vazhdojmë si qeveri në detyrë drejt zgjedhjeve të reja parlamentare”, shkroi Kurti.
Ai gjithashtu publikoi një video nga ekspozeja e tij në Kuvend, ku theksoi nevojën për unitet politik dhe përgjegjësi ndaj qytetarëve.
Fjalimi në Kuvend dhe votimi vendimtar
Në fjalën e tij para deputetëve, Kurti u bëri thirrje që të votojnë në interes të popullit, duke theksuar se propozimi i tij për kabinetin e ri kishte në qendër “përgjegjësinë publike dhe reformën e institucioneve”.
Por pas paraqitjes së listës së ministrave, Qeveria “Kurti 3” mori vetëm 56 vota për, duke mos arritur shumicën e nevojshme për miratim.
Rezultati ishte i pritshëm, pasi PDK, LDK dhe AAK kishin deklaruar më herët se nuk do të hynin në koalicion apo bashkëqeverisje me Vetëvendosjen.
Zgjedhjet tashmë një rrugë e pashmangshme
Në rrethanat aktuale, pas tetë muajsh bllokadë politike, mbajtja e zgjedhjeve të reja parlamentare duket e pashmangshme.
Sipas procedurave kushtetuese, presidentja Vjosa Osmani pritet t’i thërrasë partitë politike për takime konsultative, për të përcaktuar hapat e ardhshëm.
Nëse nuk gjendet një formulë për krijimin e shumicës parlamentare, Kosova pritet të shkojë në zgjedhje të reja brenda afatit ligjor.
