Arbëreshë Krasniqi (18): Gjatë qeverisë Kurti rënie e cilësisë në arsim, trajtim jo dinjitoz i sindikatave

Kandidatja për deputete nga “Koalicioni për Kosovën fituese”, Arbëreshë Krasniqi ka akuzuar qeverinë aktuale për mospunë në asnjë sektor gjatë katër viteve të qeverisjes.

Krasniqi ka thënë se gjatë qeverisë Kurti ka pasur rënie të cilësisë në arsim dhe mosinvestim në ndërtim të çerdheve dhe shkollave të reja.

“Unë konsideroj që gjithçka që ka në Kosovë është urgjencë që duhet të fillohet të punohet sepse në asnjë sektor nuk është punuar, po shohim papunë në secilin sektor që këta kanë udhëhequr në këto katër vite. Nëse ndalemi te arsimi ju e dini që përkundrazi që është dashur të ketë punë dhe përkushtim më të lartë për të ngritur cilësinë në arsim ne kemi vazhdueshëm ulje të rezultatit edhe në testin PISA, edhe në matës tjerë që janë realizuar në Kosovë. Prapë nëse merremi me arsim ne e dimë të gjithë sa premtimet janë bërë për këtë sektor dhe se çfarë kanë realizuar. Nuk ka pasur absolutisht mjaftueshëm investim në ndërtim të cerdheve apo shkollave të reja”, ka thënë ajo në emisionin “Ditari” në Tëvë1.

Sipas saj trajtim jo dinjitoz ka pasur edhe ndaj sindikatës së arsimit e cila siç është shprehur Krasniqi ‘është manipuluar nga qeveria’.

“Unë konsideroj që pjesë e pashmangshme e gjithë këtij trajtimi në sektorin e arsimit duhet të jenë edhe sindikatat të cilat nuk janë trajtuar mirë, por përkundrazi janë manipuluar nga kjo qeveri që mendoj se nuk e meritojnë sepse meritojnë trajtim dinjitoz pasi sindikata është një prej instrumenteve që sjell produktivitet. Pakënaqësitë kanë qenë më të mëdha në këtë qeverisje krahasuar me qeverisjet e tjera”, ka shtuar ajo