Kongresisti republikan falënderon Osmanin: Shtetet tjera duhet ta ndjekin shembullin tuaj

Kongresisti republikan amerikan, Carlos Gimenez ka lavdëruar kërkesën e presidentes Vjosa Osmani drejtuar qeverisë për të suspenduar tarifën doganore ndaj importeve të ShBA-së.

Presidentja Osmani, përmes platformës X, njoftoi se i ka kërkuar qeverisë të pezullojë tarifat për produktet amerikane, vendimi i cili, sipas saj, do të ishte një hap i rëndësishëm për të thelluar marrëdhëniet ekonomike me “aleatin tonë më të afërt”.

Veç kësaj, e para e shtetit tha se kështu do të dërgonim një mesazh të qartë se “Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata”.

E kongresisti Gimenez tha se shembullin e Kosovës duhet ta ndjekë edhe Evropa.

“Faleminderit, zonja Presidente! Kjo po pranohet mirë në Shtetet e Bashkuara dhe aleatët tanë tjerë në Evropë duhet të ndjekin shembullin tuaj”, shkroi ai në X.

Osmani ndër të tjera tha se ndjehet e bindur se heqja e tarifave do të hapte mundësi të reja për krijimin e vendeve të punës, shkëmbimin e teknologjisë dhe rritjen ekonomike afatgjatë.

“Më shumë se një lëvizje ekonomike, ky është një objektiv i politikës së jashtme, duke riafirmuar përkushtimin tonë të qëndrueshëm ndaj aleancës Kosovë-ShBA, e ndërtuar mbi vlerat e përbashkëta të lirisë dhe dekada të mbështetjes së palëkundur”, deklaroi Osmani.

Trumpi të mërkurën nënshkroi vendimin për tarifa doganore ndaj shumicës së shteteve në botë.

Ndaj Kosovës vuri tarifë prej 10%.