Kurti: Grenell ka detyra në Kore të Jugut, Venezuelë – me SHBA kam raporte të shkëlqyera

Kryeministri i Kosovës, Albin Kurti, është pyetur për raportet që ka pasur me emisarin Grenell dhe me administratën Trump.

Ai ka thënë se raportet e Kosovës janë të shkëlqyera me Amerikën.

Kurti tha se Richard Grenell është emëruar me detyra në Kore të Jugut, Venezuelë e misione të posaçme. Sipas tij, e kaluara nuk do të ndikojë në raportet aktuale.

“Në raport me Amerikën kemi marrëdhënie të shkëlqyeshme, që nuk janë vetëm në diplomaci por edhe të mbrojtjes e zhvillimit. Në fushën e mbrojtjes po bëjmë më shumë blerje. Po bëjmë trajnime të ndryshme. Nuk shoh kurrfarë vështirësish për marrëdhënie të shkëlqyera me SHBA, që janë partneri ynë kryesor. Unë nuk besoj që do të ndikojnë në raportet tona. Ish-emisari Grenell ka detyrë për Korenë e Jugut, Venezuelën dhe misione të posaçme, është e rëndësishme çfarë emërime të reja do të ketë në administratë”, tha Kurti për Kosovapress.

Kryeministri foli edhe për masat e BE-së dhe njohjet e reja.

“Për neve kruciale janë pesë shtetet e BE-së. Në politikën e jashtme kemi qenë të përqendruar te substanca. Njohjet nuk po varen vetëm prej neve. E kemi dyfishuar numrin e atasheve të mbrojtjes, kemi blerë 5 ambasada, në proces janë edhe 5 të tjera. Pasaporta e Kosovës është forcuar si asnjëherë më parë. Njohjet kanë qenë kryefjala e opozitës, mos të na krahasojnë. Nuk mendoj që janë humbur milionat, janë bllokuar. Viktima e parë e masave të BE-së ka qenë ministri Nenad Rashiq që iu anuluan takimet në Bruksel. Nuk mund të jap një datë për këtë, masat janë vënë padrejtësisht”, tha Kurti më tutje.

Kryeministri tha se synon që në zgjedhjet e 9 shkurtit t’i merr gjysmë milioni vota.

Ai tha se nuk do të ketë nevojë për koalicione pas zgjedhjeve, përderisa akuzoi opozitën se nuk është reformuar.

“Ne nuk shohim mundësi që të kemi koalicione paszgjedhore prandaj kemi bërë ato parazgjedhore, së pari me Guxo dhe Alternativën. Dhe i kemi përvojat e mbresat më të mira nga njëri-tjetri, partitë që kanë qenë gjatë në qeverisje për dy dekada, PDK, LDK, AAK, në këto 4 vite nuk kam parë që janë reformuar, dhe kur e kemi parasysh se sidomos në muajt e fundit sulmet që janë bërë ndaj subjektit tonë politik, ndaj qeverisjes së mirë e demokratike, nuk shohim mundësi të kemi çfarëdo koalicioni”, tha Kurti më tutje.

Ai tregoi premtimet kryesore për mandatin e ardhshëm.

“Duhet të themelojmë Fondin Sovran, së shpejti do të marrim dritën jeshile nga Gjykata Kushtetuese. Paralelisht edhe Bankën Zhvillimore, kjo është shtyllë e rëndësishme e reformës ekonomike. Na duhet Byroja për konfiskimin e Pasurisë, na e rrëzuan, e risollëm, sërish është në Kushtetuese. Edhe kjo Byro duhet të themelohet sivjet, ta kemi edhe Vettingun për gjyqësorin ashtu që kompetenca, integriteti e efikasiteti të jenë karakteristikë e sistemit tonë të drejtësisë”, tha kryeministri Kurti.

Kryeministri tha se rritja e çmimit të energjisë ka ardhur si rezultat i importit dhe çmimeve në bursë ndërkombëtare.