Nasim Haradinaj kërkon “betimin” e deputetëve për ndalimin e padrejtësive në Hagë

Nasim Haradinaj dhe Faton Klinaku nga Organizata e Veteranëve të Luftës së UÇK-së, kanë pritur deputetët para fillimit të seancës konstituive për të nënshkruar një betim që, përmes mandatit të tyre, të ndalin padrejtësitë në Gjykatën Speciale. Ata e morën betimin nga deputetët e të gjitha partive, por ata nuk u ndal për t’i dëgjuar Albin Kurti.

Përveç gazetarëve para Kuvendit të Kosovës, deputetët të cilët nuk po mund të verifikojnë as mandatet e tyre u pritën edhe nga përfaqësues të OVL-UÇK-së, pikërisht për të bërë një betim.

Kështu, Nasim Haradinaj së bashku me Faton Klinakun dhe veteranë të tjerë kishin shkruar në letër një betim, në të cilin deputetët duhej të nënshkruanin, dhe qëllimi ishte adresimi i padrejtësive ndaj të akuzuarve në Hagë.

Secilit deputet, në çdo hyrje, i shpjegohej.

Njëjtë bënë edhe me Donika Gërvallën, të cilën e akuzuan goxha shumë gjatë periudhës sa ishte në pozitat ekzekutive.

Ngjashëm u bë edhe me Xhelal Sveçlën dhe Sali Zybën, që në Kuvend kishin ardhur së bashku.

“Padrejtësi të cilën e ka thënë edhe Grenell e Amerika”, ka thënë Haradinaj.

Sveçla tha se do ta marrë e ta lexojë, kurse nënshkrimin menjëherë e dha deputeti i zgjedhur nga PDK, Uran Ismaili.

“Qe po e nënshkruaj tash”, ka thënë Ismaili.

Enkas për këtë letër doli anëtari i kryesisë së PDK-së, Enver Hoxhaj.

Por, pse e bëri këtë veprim sot Nasim Haradinaj?

“Të jetë një monitorim, në mënyrën e llogarisë se çfarë drejtësie po bëhet, por nëse ka abuzime dhe këta e thotë Shtëpia e Bardhë dhe presidenti i Amerikës, atëherë është dyshim i bazuar se aty nuk mund të ketë drejtësi aty ku ka abuzime”, ka thënë Haradinaj.

Haradinajt letrën nuk ia mori lideri i Vetëvendosjes, Albin Kurti.

“Kryeministër, a ka mundësi një bisedë? A i keni thënë mos me fol a?”, ka thënë Haradinaj.

Ndërkaq, betimin e morën pastaj edhe deputetë të tjerë edhe nga Lidhja Demokratike e Kosovës por edhe të AAK-së.

Në atë letër ndër të tjera, thuhet se deputetët do të zotohen se do të angazhohem për mbrojtjen e vlerave të luftës së Ushtrisë Çlirimtare të Kosovës dhe të adresojnë të gjitha padrejtësitë në procesin gjyqësor kundër krerëve të UÇK-së nga Gjykata Speciale në Hagë.

“Do të angazhohem për krijimin e mekanizmave mbikëqyrës ndaj Gjykatës Speciale, përfshirë një komision parlamentar që do të hetojë shkeljet procedurale dhe cenimet e të drejtave të njeriut, si dhe do të kërkoj përgjegjësi për çdo tejkalim të mandatit të saj”, thuhej në atë që u quajt ‘betimi për drejtësi’.