Në verën e vitit 2025, uji në Gjirin e Maines u mbush me vorbulla të gjalla blu dhe jeshile. Shkaktari? Një bloom gjigant fitoplanktoni organizma mikroskopikë, të ngjashëm me bimët, që notojnë afër sipërfaqes së oqeanit. Sipas shkencëtarëve, ky ishte një nga bloom-et më të mëdha të këtij lloji që është parë në ujërat e këtij gjiri vitet e fundit.
Instrumenti OCI (Ocean Color Instrument) në satelitin PACE të NASA-s (Plankton, Aerosol, Cloud, ocean Ecosystem) kapi këtë pamje të ujërave shumëngjyrëshe më 21 qershor 2025. Sipas Catherine Mitchell, oqeanografe satelitore në Laboratorin Bigelow për Shkencat e Oqeanit, bloom-i përmbante kokolitofore një lloj fitoplanktoni i veshur me pllaka të karbonatit të kalciumit që reflekton shumë dritë, duke i dhënë ujit pamjen e kaltër me nuancë qumështi.
Këta organizma mikroskopikë, bashkë me lloje të tjera fitoplanktoni si diatomet që lulëzojnë në pranverë, përbëjnë bazën e zinxhirit ushqimor detar. Prania ose mungesa e tyre në Gjirin e Maines ndikon drejtpërdrejt në të gjithë ekosistemin nga peshqit te butakët dhe në peshkimin që varet nga ky ekosistem.
Që nga viti 2010, bloom-e të tilla me kokolitofore u bënë më të rralla në këto ujëra, por vitet e fundit po rikthehen sërish. (Shkencëtarët kanë vënë re gjithashtu një rritje të dinoflagjelateve fitoplanktonë me bishta të hollë – si dhe një rënie afatgjatë të produktivitetit të fitoplanktonit.)
Këto ndryshime në komunitetet e fitoplanktonit në Gjirin e Maines kanë ndodhur përkrah ndryshimeve të kushteve ujore. Për shembull, vitet me reshje të dendura nga 2006 deri më 2009 e freskuan ujin e gjirit. Ndërsa nga viti 2008, ujëra të thella dhe të ngrohta nga Atlantiku i Veriut ngrohën gjirin nga fundi deri në sipërfaqe. Megjithatë, në pranverën e vitit 2025, temperaturat në fund të gjirit ishin më të ulëtat në dy dekadat e fundit.
Lidhja midis këtyre kushteve ujore dhe komuniteteve të fitoplanktonit në këtë rajon mbetet ende e paqartë, por kërkimet në vazhdim mund të japin përgjigje. Mitchell dhe kolegët e saj analizuan imazhin e PACE vetëm pak ditë para se të niseshin në një ekspeditë kërkimore për të studiuar bloom-in dhe vetitë e tjera të oqeanit nga afër. Ky ishte udhëtimi i tretë i këtij viti dhe u jep shkencëtarëve mundësinë të vërtetojnë të dhënat satelitore të ngjyrës së oqeanit përmes mostrave reale.
“Një nga përfitimet më të mëdha të PACE është se mund të ‘shohë ylberin,’” tha Mitchell. Duke matur ngjyrën e oqeanit me më shumë detaje dhe me rezolucion më të lartë se çdo satelit tjetër më parë, PACE e bën të mundur dallimin midis grupeve të ndryshme të fitoplanktonëve – në këtë rast, kokolitoforeve. “Përmes matjeve tona në terren, do të vërtetojmë vëzhgimet satelitore të ngjyrës së oqeanit nga PACE, duke përmirësuar monitorimin në Gjirin e Maines dhe duke mbështetur peshkimin dhe industrinë e akuakulturës në këtë rajon.”
Imazhi nga NASA Earth Observatory nga Wanmei Liang, duke përdorur të dhëna nga PACE, EOSDIS LANCE dhe GIBS/Worldview. Teksti nga Kathryn Hansen.
Zbuloni më tepër nga Illyran Info
Pajtohuni, që të merrni postimet më të reja dërguar drejt e në email-in tuaj.
