Këshilli Bashkiak shkarkoi këtë të martë, 23 shtator, nga detyra kryetarin e Bashkisë së Tiranës, Erion Veliaj.
Veliaj, i cili ndodhet në paraburgim që prej 10 shkurtit, nuk ishte i pranishëm në mbledhje, pasi kërkesa e tij u refuzua më herët nga Komisioni i Çështjeve Ligjore. Mungesa e tij sakaq, nuk u diskutua në asnjë moment nga të pranishmit.
Të pranishmit mbajtën nga 5 minuta fjalim për procedurë. Anëtarët socialistë u shprehen se ky hap lidhet me nevojën për t’i dhënë fund ngërçit politik që ka kapluar kryeqytetin që pas arrestimit të Veliajt. Nga ana tjetër, anëtarët e opozitës nisën të listonin akuza të ndryshme ndaj Veliajt, teksa nuk fshehnin as “gëzimin” për shkarkimin e tij si kryebashkiak.
Shkarkimi i Veliajt u iniciua nga këshilltarët socialistë në Bashkinë e Tiranës, të cilët u vunë në lëvizje pas kërkesës së kryeministrit Edi Rama në Asamblenë e Partisë Socialiste. Ata e argumentojnë kërkesën e tyre me mungesën në detyrë për 3 muaj sipas ligjit “Për Vetëqeverisjen Vendore”.
Kujtojmë se Veliaj dhe bashkëshortja e tij, Ajola Xoxa janë nën hetim nga SPAK për korrupsion dhe pastrim parash, akuzat të cilat ata i kanë mohuar dhe cilësuar si sulm politik. SPAK pritet të komunikojë përfundimin e hetimit ndaj tyre gjatë këtij muaji.
Mbledhja e sotme shënoi një nga momentet më të tensionuara në historikun e Bashkisë së Tiranës. Sakaq, ai ka të drejtë ta ankimojë vendimin në Gjykatën Kushtetuese 15 ditë më vonë, më pas është ky organ që jep verdiktin.
Discover more from Illyran Info
Subscribe to get the latest posts sent to your email.
