Unioni Europian i Transmetimit (EBU) ka konfirmuar se do të organizojë votim online gjatë nëntorit, çka mund të rezultojë në përjashtimin e transmetuesit izraelit, Kan nga Eurovision-i i vitit të ardhshëm.
Në një letër drejtuar transmetuesve, presidentja Delphine Ernotte Cunci, shkroi se kishte një “diversitet të paprecedentë këndvështrimesh” për pjesëmarrjen e Izraelit në Eurovision dhe çështja kërkon “një bazë më të gjerë demokratike”.
“Ne mund të konfirmojmë se është dërguar një letër nga bordi ekzekutiv i Unionit Europian të Transmetimit drejt drejtorëve të përgjithshëm të të gjithë anëtarëve tanë për t’i informuar se në një mbledhje e jashtëzakonshme të asamblesë së përgjithshme të Unionit në fillim të nëntorit do të mbahet një votim për pjesëmarrjen në konkursin e Eurovision 2026”, konfirmoi institucioni përmes një deklarate.
Ky vendim është marrë pasi disa transmetues si Spanja, Holanda, Irlanda, Islanda dhe Sllovenia kanë kërcënuar se do të bojkotojnë edicionin e ardhshëm të ngjarjes më të rëndësishme të muzikës live nëse do të lejohet pjesëmarrja e Izraelit.
Rusia është ndaluar të marrë pjesë në Eurovision pas pushtimit të Ukrainës në 2022. Ndërkohë Izraeli, i cili e ka fituar kompeticionin katër herë që prej pjesëmarrjes së parë në 1973, ka vazhduar të konkurrojë përgjatë dy viteve të fundit pavarësisht konflikteve.
Konkursi i 2024 në Malmö të Suedisë dhe ai i Bazelit në Zvicër këtë vit u shenjuan nga protesta pro-Palestinës.
Eurovision i i vitit të ardhshëm, i cili shënon edhe 70-vjetorin e tij, do të mbahet në muajin maj në Vjenë.
Transmetuesi austriak ORF shprehu optimizëm gjatë kësaj jave se kompeticioni do të realizohej edhe në rast bojkotimesh dhe pakësimin e kontributeve nga transmetuesit.
Discover more from Illyran Info
Subscribe to get the latest posts sent to your email.
