Presidenti rus Vladimir Putin ka pranuar publikisht se fushata e sulmeve me dronë nga ana e Ukrainës ndaj rafinerive të naftës dhe infrastrukturës energjetike ruse ka shkaktuar dëme të ndjeshme ekonomike, duke i kushtuar Moskës rreth 1 për qind të Prodhimit të Brendshëm Bruto (PBB).
Gjatë fjalimit të tij në Klubin e Diskutimeve Valdai në Moskë, udhëheqësi i Kremlinit deklaroi se Ukraina “ka arritur disa rezultate” me goditjet e saj mbi leqet industriale dhe energjetike në thellësi të territorit rus.
“Në të vërtetë, ata arritën të sigurojnë disa rezultate, sipas vlerësimeve tona, dhe na morën rreth 1% të PBB-së”, u shpreh Putin para audiencës.
Pavarësisht këtij pranimi, kreu i shtetit rus u përpoq të arsyetonte veprimet e ushtrisë së tij, duke pretenduar se Ukraina kishte goditur e para infrastrukturën civile dhe se Moska thjesht u “detyrua” të përgjigjej. Këto pretendime rrëzohen nga Kijevi dhe aleatët perëndimorë, të cilët rikujtojnë se Rusia ka bombarduar në mënyrë sistemike qytetet, rrjetin elektrik dhe qendrat e banuara ukrainase që nga ditët e para të pushtimit.
Në një tjetër kalim me tonë alarmuese, Putin përsëriti narrativën e tij se Rusia u vendos “qëllimisht në një situatë ku thjesht u detyrua të reagonte”, ndërsa lëshoi paralajmërime për mundësinë e përdorimit të armëve të shkatërrimit në masë nëse përshkallëzimi i konfliktit vazhdon.
“A mund të jemi të sigurt se këto armë nuk do të përdoren kurrë? Fatkeqësisht, nuk mund të jemi të sigurt”, deklaroi ai, duke shtuar se tensionet aktuale po e çojnë globin “në skaj të humnerës” dhe se konflikti ka gjasë të zgjasë.
Duke u ndalur te gjeopolitika globale, udhëheqësi rus argumentoi se dobësimi i dominimit perëndimor po i hap rrugën një rendi të ri ndërkombëtar, por paralajmëroi se ky tranzicion do të jetë i mbushur me rreziqe për shtetet dhe shoqëritë në mbarë botën.
